وہ جس پہ ہم کو بھروسہ ہی بے تحاشا تھا

12-06-2020
وہ جس پہ  ہم  کو  بھروسہ ہی بے تحاشا تھا
اُسی  کے   واسطے   یہ   پیار  اِک   تماشا  تھا

ہمیں  وہ   دیکھ  کے  ہنستا  تھا  بِلبلاتے  ہُوۓ
سو   ہم   نے   زخم  سِسکتے  ہوئے  خراشا تھا

مِلا  نہیں تھا جہانوں کی خاک چھان  کے بھی
اُسے   وجود   میں   اپنے   ہی   پھر  تلاشا تھا

وفا   شعار   تھے  احباب  ڈھال ہی   تھے  مگر
نہ   جانے  کس   نے  ہمارے   بدن کو  قاشا تھا

جو  نِیم  جان  پڑا   تھا  وہ جسم  برسوں بعد
کسی   کے   لمس  کے   جادُو   سے ارتعاشا تھا

ہمارے ذہن  میں رہتی تھی سوچ اُس کی فقط
یہ دِل بھی شوق سے سُنتا اُسی کی بھاشا تھا

غلط  نہیں   تھا   اُسے   دیکھ   کر   بدلتے  راہ
اُسے تو  ہم  نے کہا  پھر  بھی "دَل تہ راشا" تھا

ہماری    نرم   مزاجی   کے   معترف  تھے  عُدو
کہ  ہم  نے  مُنہ  میں  رکھا  خُلق  کا  بتاشا تھا

طلب  ہوئی  ہمیں کاشف  کبھی  جو لکھنے کی
قلم  نے  اس کا  ہی پھر خال  و  خد  تراشا تھا

                                                   کاشف رانا