دسمبر مرد جیسا ہے

 دسمبر مرد جیسا ہے 

یہ ایسے فرد جیسا ہے 

جو سب کے بیچ رہ کر بھی 

کسی سے کچھ نہ کہ کر بھی

خزاں کا درد سہھ کر بھی

 کسی چٹان کی مانند

کھڑا ہے مستقل ایسے 

نہ کوئ درد ہو جیسے

دکھاوے میں ہے یخبستہ

مگر پردے میں یے ہنستا

مناؤ تم سیاہ دن

یا بولو الوداع اسکو

نہ اسکو فرق پڑتا  تھا

نہ اسکو فرق پڑتا ہے 

اسے جو مرضی کہ ڈالو

یہ اپنی مرضی کرتا  ہے۔ ۔۔۔

گئے دنوں کا سُراغ لے کر

گئے دنوں کا سُراغ لے کر 

کدھر سے آیا کدھر گیا وہ  

عجیب مانوس اجنبی تھا 

مجھے تو حیران کر گیا وہ 

بس ایک موتی سی چَھب دِکھا کر 

بس ایک میٹھی سی دُھن سنا کر 

ستارۂ شام بن کے آیا 

برنگِ خوابِ سَحر گیا وہ 

خوشی کی رُت ھو کہ غم کا موسم 

نظر اسے ڈھونڈتی ہے ہر دم 

وہ بُوئے گل تھا کہ نغمۂ جاں 

میرے تو دِل میں اتُر گیا وہ 

نہ اب وہ یادوں کا چڑھتا دریا 

نہ فرصتوں کی اُداس بَرکھا 

یوں ھی ذرا سی کسک ھے دل میں 

جو زخم گہرا تھا بھر گیا وہ 

کچھ اب سنبھلنے لگی ھے جاں بھی 

بدل چلا رنگِ آسماں بھی 

جو رات بھاری تھی ٹل گئی ھے 

جو دن کڑا تھا گزر گیا وہ 

بس ایک منزل ھے بوالہوس کی 

ھزار رستے ھیں اھلِ دل کے 

یہی تو ھے فرق مجھ میں اُس میں 

گزر گیا میں ، ٹھہر گیا وہ 

شکستہ پا راہ میں کھڑا ھُوں 

گئے دنوں کو بلا رھا ھُوں 

جو قافلہ میرا ھم سفر تھا 

مثالِ گرد سفر گیا وہ 

میرا تو خُوں ھو گیا ھے پانی 

ستم گروں کی پلک نہ بھیگی 

جو نالہ اُٹھا تھا رات دل سے 

نہ جانے کیوں بے اثر گیا وہ 

وہ مئے کدے کو جگانے والا 

وہ رات کی نیند اڑانے والا 

یہ آج کیا اُس کے جی میں آئی 

کہ شام ھوتے ھی گھر گیا وہ 

وہ ھجر کی رات کا ستارہ 

وہ ھم نفس ھم سخن ھمارا 

سَدا رھے اُس کا نام پیارا 

سُنا ھے کل رات مَر گیا وہ 

وہ جس کے شانے پہ ھاتھ رکھ کر 

سفر کیا تُو نے منزلوں کا 

تری گلی سے نہ جانے کیوں آج 

سر جُھکائے گزر گیا وہ 

وہ رات کا بے نَوا مسافر 

وہ تیرا شاعر وہ تیرا ناصرؔ 

تیری گلی تک تو ھم نے دیکھا تھا 

پھر نہ جانے کدھر گیا وہ   

"ناصر کاظمی".....

مقروض کے بگڑے ہوئے حالات کی مانند مجبور کے ہونٹوں پہ

مقروض کے بگڑے ہوئے حالات کی مانند

مجبور کے ہونٹوں پہ سوالات کی مانند

دل کا تیری چاہت میں عجب حال ہوا ہے

سیلاب سے برباد مکانات کی مانند

میں ان میں بھٹکے ہوئے جگنو کی طرح ہوں

اس شخص کی آنکھیں ہیں کسی رات کی مانند

دل روز سجاتا ہوں میں دلہن کی طرح سے

غم روز چلے آتے ہیں بارات کی مانند

اب یہ بھی نہیں یاد کہ کیا نام تھا اس کا

جس شخص کو مانگا تھا مناجات کی مانند

کس درجہ مقدس ہے تیرے قرب کی خواہش

معصوم سے بچے کے خیالات کی مانند

اس شخص سے ملنا محسن میرا ممکن ہی نہیں ہے

میں پیاس کا صحرا ہوں وہ برسات کی مانند

کب ہے وصالِ یار کی محرومیوں‌کا غم

 دل سے کوئی بھی عہد نبھایا نہیں گیا 

سر سے جمالِ یار کا سایہ نہیں گیا 

کب ہے وصالِ یار کی محرومیوں‌کا غم 

یہ خواب تھا سو ہم کو دکھایا نہیں گیا 

میں جانتا تھا آگ لگے گی ہر ایک سمت 

مجھ سے مگر چراغ بجھایا نہیں گیا 

وہ شوخ آئینے کے برابر کھڑا رہا 

مجھ سے بھی آئینے کو ہٹایا نہیں گیا 

ہاں ہاں نہیں ہے کچھ بھی مرے اختیار میں 

ہاں ہاں وہ شخص مجھ سے بھلایا نہیں گیا 

اڑتا رہا میں دیر تلک پنچھیوں کے ساتھ 

اے سعد مجھ سے جال بچھایا نہیں گیا 

 سعداللہ شاہ

دستور محبت کا سکھایا نہیں جاتا

 دستور محبت کا سکھایا نہیں جاتا 

یہ ایسا سبق ہے جو پڑھایا نہیں جاتا 

کمسن ہیں وہ ایسے انہیں ظالم کہوں کیسے 

معصوم پہ الزام لگایا نہیں جاتا 

آئینہ دکھایا تو کہا آئینہ رخ نے 

آئینے کو آئینہ دکھایا نہیں جاتا 

کیا چھیڑ ہے آنچل سے گلستاں میں صبا کی 

ان سے رخ روشن کو چھپایا نہیں جاتا 

حیرت ہے کہ مے خانے میں جاتا نہیں زاہد 

جنت میں مسلمان سے جایا نہیں جاتا 

اب موت ہی لے جائے تو لے جائے یہاں سے 

کوچے سے ترے ہم سے تو جایا نہیں جاتا 

اس درجہ پشیماں مرا قاتل ہے کہ اس سے 

محشر میں مرے سامنے آیا نہیں جاتا 

پرنمؔ غم الفت میں تم آنسو نہ بہاؤ 

اس آگ کو پانی سے بجھایا نہیں جاتا

پرنم الہ آبادی

اچھی آنکھوں کے پجاری ہیں میرے شہر کے لوگ

 اچھی آنکھوں کے پجاری ہیں میرے شہر کے لوگ

تو میرے شہر میں آئے گا _تو چھا جائے گا

ہم قیامت بھی اٹھائیں گے تو ہوگا نہیں کچھ

تو فقط آنکھ اٹھائے گا _تو چھا جائے گا

پھول تو پھول ہیں وہ شخص اگر کانٹے

اپنے بالوں میں سجائے گا_ تو چھا جائے گا

یوں تو ہر رنگ ہی سجتا ھے برابر اس پر

سرخ پوشاک میں آئے گا _تو چھا جائے گا

جس مصور کی نہیں بکتی کوئی بھی تصویر

تیری تصویر بناۓ گا_ تو چھا جائے گا

⁦

رحمان فارس

ہنسی لبوں پہ سجائے اُداس رہتا ہے

 ہنسی لبوں پہ سجائے اُداس رہتا ہے

یہ کون ہےجو مِرے گھر کے پاس رہتاہے

 

یہ اور بات کہ مِلتا نہیں کوئی اُس سے

مگر، وہ شخص سراپا سپاس رہتا ہے

جہاں پہ ڈوب گیا میری آس کا سُورج

اُسی جگہ وہ سِتارہ شناس رہتا ہے

گُزر رہا ہُوں میں سوداگروں کی بستی سے

بدن پر دیکھیے کب تک لباس رہتا ہے

لکھی ہے کس نے یہ تحریر ریگِ ساحِل پر

بہت دِنوں سے سمندر اُداس رہتا ہے

میں وحشتوں کےسفرمیں بھی، ہُوں کہاں تنہا

یہی گماں ہے کوئی آس پاس رہتا ہے

وہ فاصلوں میں بھی رکھتا ہے رنگ قُربت کے

نظر سے دُور سہی، دِل کے پاس رہتا ہے

جب اُن سے گفتگو کرتا ہے کوئی بھی اعجاز !

اِک اِلتماس، پسِ اِلتماس رہتا ہے

اعجاز رحمانی

نہ نصیب ہو تجھے ہنسنا، تیرے دل میں درد اٹھا

 یہ دعا ہے آتشِ عشق میں تو بھی میری طرح جلا کرے

نہ نصیب ہو تجھے ہنسنا، تیرے دل میں درد اٹھا کرے

زلفیں کھولے اور چشم تر، تیرے لب پہ نالۂ سوزگر

تو میری تلاش میں دربدر لئے دل کو اپنے پھرا کرے

تو بھی چوٹ کھائے او بے وفا، آئے دل دکھانے کا پھر مزا

کرے آہ و زاریاں درد، مجھے بے وفا تو کہا کرے

رہے نامراد رقیب تو، نہ خدا دکھائے تجھے خوشیاں

نہ نصیب شربت دل ہو، سدا زہرِ غم تو پیا کرے

تجھے مرض ہو تو ایسا ہو، جو دنیا میں لاعلاج ہو

تیری موت تیرا شباب ہو، تو تڑپ تڑپ کے جیا کرے

تیرے سامنے تیرا گھر جلے، تیرا بس چلے نہ بجھا سکے

تیرے منہ سے نکلے یہی دعا کہ نہ گھر کسی کا جلا کرے

تجھے میرے ہی سے خلش رہے، تجھے میری ہی تپش رہے

جیسے تو نے میرا جلایا دل، ویسے تیرا بھی دل جلا کرے

جو کسی کے دل کو دکھائے گا، وہ ضرر ضرور اٹھائے گا

وہ سزا زمانے سے پائے گا، جو کسی سے مل کر دغا کرے

تیرا شوق مجھ سے ہو پیکرانہ، تیری آرزوئیں بھی ہوں جوان

مگر عین عہدِ بہار میں، لٹے باغ تیرا خدا کرے

خدا کرے آئے وہ بھی دن، تجھے چین آئے نہ مجھ بن

تو گلے ملے، میں پرے ہٹوں، میری منتیں تو کیا کرے

(جگر مراد آبادی)

💔💔

اگر تعلق پہ برف ایسے جمی رہے

اگر تعلق پہ برف ایسے جمی رہے گی

 ہمیں تمہاری، تمہیں ہمہاری کمی رہے گی

مرے لہو میں بغاوتوں کا رچاؤ سا ہے

مری ہمیشہ صلیب سے ہمدمی رہے گی

سمے کا دھارا سفید روئی گرا رہا ہے

میں سوچتا ہوں وہ زلف کیا ریشمی رہے گی!!!!! 

ہمیں مکمل خوشی کبھی نہ نصیب ہوگی

ہماری قسمت میں ہلکی پھلکی غمی رہے گی

اے میرے بارش کے موسموں میں بچھڑنے والے

بتا ان آنکھوں میں کب تلک یوں نمی رہے گی؟ 

میں اپنے قدموں پہ اپنے دم سے کھڑا ہوا ہوں

ان آندھیوں کی تو مجھ سے یہ برہمی رہے گی

پکڑ کے رکھا ہوا ہے جب تک یوں ہاتھ تم نے

یہ سانس میری تھمی ہوئی ہے تھمی رہے گی

آزاد حسین آزاد

محبت کے اصولوں سے

 محبت کے اصولوں سے

کبھی الجھا نہیں کرتے

یہ الحاد حقیقت ھے،

سنو ایسا نہیں کرتے

بہت کم ظرف لوگوں سے

بہت محتاط رھتے ھیں

بنا سوچے سمندر میں

یونہی اترا نہیں کرتے

تیری ساقی سخاوت پہ میں

سانسیں وار دوں لیکن

میرے کامل کا فرماں ھے

کبھی بہکا نہیں کرتے

محبت سے ضروری ھے

غم دنیا کا افسانہ

محبت کے حسیں قصوں میں

کھو جایا نہیں کرتے

جسے دیکھو ،

اسے سوچو ،

جسے سوچو ،

اسے پاؤ

جسے نہ پا سکو...

اسکو کبھی دیکھا نہیں کرتے

مجھے تائب ،

وفا بردار لوگوں سے شکایت ھے

بہت تنقید کرتے ھیں ،

مگر اچھا نہیں کرتے....!!